ЗСРСМ

Дата: 18.09.2025

Во рамки на Програмата за јакнење на демократијата во Западен Балкан (DEP), финансирана од Sustainable Criminal Justice Solutions (SCJS), денес се одржа значајна средба помеѓу претставници на оваа британска организација експертите Калум Кокс и Стјуарт Крозиер и претставници на Здружението на судиите на Република Северна Македонија судија Иван Џолев - претседател на ЗСРСМ и судија на Апелационен суд Скопје, судија Џемали Саити - претходен претседател на ЗСРСМ и судија на Врховен суд на РСМ и судија Осман Шабани - член на Управен одбор на ЗСРСМ и судија на Апелационен суд Скопје. Претседателот на Здружението на судиите, г-дин Иван Џолев, изрази целосна поддршка за целите на програмата. Главна тема на дискусија беа предизвиците и можностите за јакнење на независноста, транспарентноста и одговорноста на судството во државата. Програмата за јакнење на демократијата во Западен Балкан (Democratic Empowerment Programе - DEP), која се спроведува од април 2025 до март 2026 година во пет земји од Западен Балкан (Босна и Херцеговина, Црна Гора, Северна Македонија, Косово и Србија), има за цел да се фокусира на клучните аспекти на владеењето на правото. Поконкретно за Северна Македонија, акцентот е ставен на: Јакнење на судските институции против политичките влијанија. Зголемување на транспарентноста во носењето на судските одлуки. Подобрување на постапките за избор на судии во повисок суд. Утврдување на одговорност на судиите. Претставниците на Sustainable Criminal Justice Solutions (SCJS) ја истакнаа важноста од соработка со локални институции и организации, како што е Здружението на судиите, за успешна реализација на програмските цели. Г-дин Џолев ја поздрави иницијативата и изрази подготвеност за активно учество во сите идни активности, потенцирајќи дека јакнењето на судскиот систем е од клучно значење за правдата и демократијата во државата. Средбата заврши со заеднички заклучок за продлабочување на соработката и продолжување на дијалогот во наредниот период.

Дата: 13.08.2025

Соопштение на Секретаријатот на Глобалната мрежа за судски интегритет за претстојниот настан „Конференција за жени во правото “ Women in Law Conference што ќе се одржи од 11 до 13 септември 2025 година, Виена, Австрија. Овој проницлив настан ќе се фокусира на напредокот и предизвиците поврзани со унапредувањето на жените во правната област, вклучително и во судството. Ветува дека ќе понуди вредни перспективи, експертски дискусии и можности за вмрежување. Доколку оваа тема ве интересира, Ве охрабруваме да ја посетите веб-страницата https://www.womeninlawconference.at/

Дата: 23.07.2025

Здружението на судии на РСМ и Основниот кривичен суд Скопје денеска потпишаа Меморандум за соработка со Приватна високообразовна институција Бреинстер Некст Скопје со цел воведување нови дигиталните алатки во Кривичниот суд, за поголема ефикасност и економичност на постапките и полесен пристап на граѓаните до услугите во надлежност на судовите. Студентите на Бреинстер Некст, кои ќе посетуваат практична настава во Судот, ќе работат на воведување нови апликации преко кои со помош на Вештачка интелигенција ќе овозможат: - Алатка за пренесување на аудио записите од главните расправи во текстуална форма ( speech to text ) на македонски јазик, - Унапредување на технологијата за аудио и видео снимање на главните расправи - Посебна апликација за директно и брзо анонимизирање на судските пресуди и - Унапредување на веб страната на судот и поголема достапност на судот преку социјалните мрежи. Меморандумот опфаќа и соодветна заштита на податоците, па така студентите нема да имаа директен пристап во судскиот систем и увид во не правосилни предмети, а воедно ќе се запазат и сите Законски одредби за заштита на личните податоци на странките и доверливоста на постапките. Соработката со академијата е иницирана пред се заради олеснување на работата на судиите и судската служба со користење на Вештачката интелигенција, побрз пристап до правдата и ефикасно водење на постапките со целосно почитување на Законските одредби од ЗКП и Законот за судови. Но, воедно е од особен интерес за транспарентноста и отчетноста на судот и збогатување на фондот на објавени пресуди кои ќе бидат од интерес како за медиумите и невладините организации така и за збогатување на судската пракса.

Дата: 04.07.2025

Претседателот на Здружение на судиите на Република Северна Македонија судија Иван Џолев одржа работен состанок со г-ѓа Cecilia Maronnier меѓународен експерт во Министерството за правда од EXPERTISE FRANCE, француска агенција за меѓународна техничка експертиза и г-ѓа Rachelle Ganeme меѓународен експерт која работи во седиштето на EXPERTISE FRANCE во Париз задолжена за соработка со земјите од Западен Балкан за прашања поврзани со судството, владеењето на правото, борбата против котупцијата. На состанокот се разговараше за идни активности и зајакнување на билатералната соработка во областа на правосудниот сектор. Меѓу приоритетите кои Претседателот на Здружение на судиите, судија Иван Џолев ги нагласи се неопходните реформи во правосудниот сектор, потребата од вложување во кадровските капацитети во судовите во државата, независно судство и независен судски буџет.