ИЗВЕШТАЈ

од одржанo Собрание на Меѓународното Здружение на Судии (IAJ)

на 11-12.09.2021 година

На 11-12.09.2021 година, преку онлајн платформата ЗООМ, се одржа Собрание на Меѓународното здружение на судии, на кое присуствуваа претставници од 65 здруженија на судии од земјите – членки. Здружението на судии на РСМ беше претставено со два делегата, судиите Бетим Јахја и Ѓорѓи Андонов.

На самиот почеток на собранието се изрази солидарност и поддршка со судиите од Авганистан и се побара сите членки да направат напори за помош на истите, а потоа на собранието се разгледаа и дискутираа повеќе точки и теми од интерес за ИАЈ. Беше избран нов претседател на Здружението, судијата Хозе Игреја Матош од Португалија, кој е досегашен претседател на Европското здружение на судии. Беа избрани и 6 потпретседатели, од кои тројца се од европската зона. И претседателот и потпретседателите беа избрани со акламација. Досегашниот претседател на Здружението, судијата Тони Пагоне од Австралија, е назначен за почесен претседател на Здружението.

Беа разгледани и усвоени извештаите за работата на претседателот, генералниот секретар и на претседателите на регионалните групи за периодот помеѓу две собранија, како и финансиските извештаи за работењето на Здружението. Исто така, беа ратификувани и одлуките на Претседателството донесени за време на пандемијата, а кои се однесуваат на продолжувањето на мандатот на неговите членови и Генералниот секретар заради пандемијата, намалувањето на членарината за 2020 година, како и прекинот на Мониторингот над состојбата на правосудствата во 2020 и продолжување во 2021 година. Беа усвоени и измените на Статутот и правилниците поврзани со состојбата предизвикана од пандемијата.

На ова собрание како членки беа изгласани и примени здруженијата на судии од земјите Габон и Филипини.

Делегатите на ЗСРСМ дадоа поддршка за горе наведените одлуки и ги поздравија одлуките за избор на новото раководство и приемот на нови членки.

По завршувањето на собранието, на ден 12.09.2021 година, се одржа и состанок на Европското здружение на судии (ЕАЈ), на кој делегатите, меѓу кои и од ЗСРСМ, за нов претседател го избраа судијата Џуро Сеса од Хрватска.

Подносители на извештајот:

- Судија Бетим Јахја

- Судија Ѓорѓи Андонов