До Советодавното тело за етика на судиите и судиите поротници се поднесе иницјатива од страна на судија која содржеше прашање Дали судија може да ги користи социјалните медиуми како начин на комунијација со другите судии, односно колеги (обвинители, адвокати, професори, правници и др.) и до која мера може тој/таа да ги користи, односно треба да има?

Прашањето е од од областа на судиската транспарентност, односно во врска со користењето на социјалните медиуми (Facebook, Instagram, Twitter и др.) од страна на судиите.

Советодавното тело за етика на судиите и судиите поротници при Здружение на судиите на Република Северна Македонија, на седница одржана на ден 22.06.2020 година, го донесе следното:

МИСЛЕЊЕ

Судијата како и секој граѓанин, го ужива правото на слобода на изразување, во границите на неговите законски права и обврски, начелата за судската власт, принципите за непристрасност, интегритет и пристојност, а во име на дигнитетот на судијата и судиската функција.

Со оглед што вршењето на судиската функција е предмет на постојано набљудување, судијата како во својот професионален така и во својот приватен живот, со своите изјави и активности на социјалните мрежи, медиуми и платформи, е должен да внимава да не го наруши својот углед, како и да се грижи за сочувување на довербата на јавноста во судскиот систем.

Судијата треба да ги користи социјалните медиуми со цел за приближување до јавноста на работата на судовите и подобрување на перцепцијата за судиската функција.