Скопје, 12 ноември 2015 година - во просториите на Здружението на судиите на Република Македонија се одржа средба со г.Ѓуро Сеса, судија на Врховниот суд на Република Хрватска, претседател на Здружението на судии на Р.Хрватска и потпретседател на Меѓународното здружение на судии и г-ѓа Нина Бетето, судија и потпретседател на Врховниот суд, потпретседател на Здружението на судии на Р.Словенија и претставник на Словенија во Консултативниот совет на европските судии на Советот на Европа. Како претставници од Здружението на судиите на Република Македонија на состанокот присуствуваа претседателот на Здружението на судии на Република Македонија, судија Николчо Николовски и потпретседателот, судија Антоанета Димовска. Средбата беше во рамките на ИПА проектот „Понатамошна поддршка за независно, одговорно, стручно и ефикасно судство и промоција на условната казна и алтернативни мерки“ . На средбата се разговараше за Кодексот за судиска етика на судиите на Република Македонија, донесен од Собранието на Здружението на судиите на Република Македонија на 20.6.2014 година и за неговата примена. |